香港鍾意打 Wargame 的人有好多，但好似呢部 Motoped Survival Bike 超級山地單車咁，唔知會唔會有朋友買嚟去打 Wargame 呢？

呢部人力 / 引擎兩用的 Motoped，經過廠方特別照顧後，就變成呢個樣：名叫 Black Ops Surivial Bike，當然用嚟走佬 / 打仗用啦！一身塗上軍綠色，配以銀色的引擎，前後兩支一睇就知厲害的前後避震，淨睇外型就已經估到呢部 Motoped Black Ops Survival Bike 應該係一部上山下海的 ｢兩轆車｣！不過，佢仲有一個小小的大齒盤及腳踏，証明佢仲係一部單車嚟架！而最搶眼的，應該係後面行李架掛住的兩個一加侖軍綠色油筒，以及一支十字弓！咦？到真係打仗嗰陣，用佢嚟走佬同擊退敵軍都應該無問題！而且無嘢食嗰陣仲可以用支弓嚟打獵添！Motoped Black Ops Surivial Bike 其實仲有唔少細節，用來幫你野外求生用，例如油缸隔離放了一把萬用刀，仲有斧頭，魚叉......

仲想知呢部 Motoped 仲裝咗啲乜？等小編幫大家睇下啦：

• 十字弓一支
• 一加侖油筒一個
• 鏟、斧頭、魚叉......
• 鋸
• 頭尾燈
• 繩 (好似用來爬山用......)
• LED 電筒
• iPhone / GPS 單車用 Mount
• 萬用刀
• 萬用修理工具

呢部 Wargame / 走佬兩用 Motoped Black Ops Survival Bike 究竟幾錢？其實官方都未公佈價錢，只係知一部未改裝，未連引擎的 Motoped 約值 USD $1,999，約 HKD $15,590，而一副四衝程估計就值大約 USD $535，即約 HKD $4,180，但上面列出的所有 ｢武器｣ 的成本就未能估計......所以，如果你想買嚟打 Wargame？你預幾萬蚊喇要！

一睇就知 Motoped Black Ops Survival Bike 呢部 ｢單車｣ 並唔簡單！

左右兩邊睇睇，你會發覺部車收埋咗好多有用工具，例如繩、斧頭、鏟等，當然仲有大大支十字弓 ( Crossbow ) 啦！

50cc 四衝程引擎的油缸，襯上軍綠色，其實好型！旁邊就有一把刀，用嚟......小編估係用嚟開山，或者係用嚟据扒掛......

腳踏位置，有特別的方法連到後輪，証明呢部 Bike 仲係一部單車！

十字弓，唔使特別介紹吧！( 而小編不知道呢啲武器資料......)

打仗 / 走佬最怕盪失路，所以廠方加左一個 iPhone / GPS 的電話座，幫手帶路

拆晒 ｢武器｣ 之後，Motoped Black Ops Survival Bike 個樣其實都唔差架！

PS. 小編熱愛和平，唔希望大家真係有一日要用到呢部單車嚟走佬......

更多資料：Motoped Black Ops Survival Bike / Kickstarter - Motoped Motorized Bike