身為廿四孝爸爸的你，如果想買單車俾小朋友，等佢可以第日陪你踩車，但係又覺得坊間啲小孩單車太平凡？呢部 Strider ST-Pro 應該可以納入你的 Shopping-List！

Strider 是一間專門製作小朋友學行單車的牌子，外國有好多朋友的小朋友，都靠佢的出品來得到唔少寶貴的童年回憶！有見爸爸們踩的單車愈來愈 Pro，作為佢哋的小朋友，佢哋嘅 ｢ 愛駒 ｣ 邊可以失禮架！所以，就出現咗 Strider ST-Pro 喇！

Strider ST-Pro 睇落個樣同普普通通小朋友學行單車好似，但係一攞上手，你就知分別喇！ST-Pro 只係重 4.9 磅，即係大約 2.2kg，雖然之前我哋講過，全世界最輕的單車，都只係 2.7kg，但係唔可以咁樣比呢！因為一般的學行單車，以 Strider 其他型號為例，就大約重 6.7 磅，即係大約 3kg 重。晌細路仔的世界，呢部單車算係好輕喇！

點解 ST-Pro 會咁輕，其實佢用咗全鋁金屬車架，不單輕，而且防鏽，啱晒小朋友將部車周圍泊 ( 只限外國，香港......)，而輪胎都用咗特別的 EVA 物料製造，比傳統打氣的輪胎輕咗一半之餘，亦都唔會爆胎。

Strider ST-Pro 預計今個月面世，但係價錢就未有資料。睇返佢哋的單車，最貴都只係賣緊 USD $189，即係大約 $1,480 港幣，估計就算 ST-Pro 比呢個價錢貴一倍，都係大約 $3,000 度，對廿四孝富爸爸嚟講，$3,000 買部咁輕的單車俾小朋友，唔難吖！因為自己可能幫自己部單車換個手把，都要呢個數啦......

另外再提醒大家，ST-Pro 只限 1.5 - 5 歲小朋友玩，如果心智差唔多年紀嘅大人諗住買嚟自己踩的話，唔好意思，你都係買返普通單車啦！

全銀色鋁合設計，睇落好似好普通，但係踩落就知！

用上特別 EVA 輪胎，特別輕兼且唔會爆胎！

輕到兩個小朋友可以抬車影相！小編諗，如果爸爸同囝囝一齊舉起自己部單車，chok 住嚟影相，嘩！肯定爆 Like！

同場加映，真係全碳纖加碟剎小孩單車，澳洲製造，型爆！但係唔算好貴，AUD $600，即係 $4,400 港紙。有興趣可以去呢度睇睇

相關網站： Strider ST-Pro