踩單車嗰陣，你可能會覺得揹住個背囊唔夠霸氣。但呢個背囊應該幫你搵返應有嘅霸氣同時，踩單車仲會更加安全添！

明眼人一眼就睇得出呢個一定唔係一般嘅 ｢SPI｣ 背囊啦！揹住佢有晒霸氣，晌單車徑羸盡收視！

美國一位設計師 William Root 就用咗龜殼作設計靈感，設計咗呢個既硬淨，又靚仔嘅單車背嚢。背囊外殼採用鋼琴黑面硬膠殼製造，不單外型靚絕其他背囊，硬殼亦都為背囊入面嘅寶貴物品提供周全保護；加埋防水拉鍊，加強防水效果，用家晌落雨時踩單車都唔怕整濕背囊入面嘅嘢喇！流線型嘅設計亦都令成個背囊嘅外型加唔少分數。

採用黑鋼琴面設計，加埋起角設計，小編覺得咁多背囊入面，佢都算係最型嗰隻！睇下睇下，仲覺得好似當年 HTC 一隻好出名嘅手提電話添！

硬膠外殼加埋防水拉鍊，落雨都唔怕整濕袋入面嘅嘢喇！

流線型設計，令你睇落唔會好似揹住舊膠盒出街，正！

但唔好以為成個背囊都好硬，佢背後部份加咗 Cushion，所以揹落都唔會好似揹住一舊硬膠咁辛苦！

背囊前後對照，嗱！後面有 Cushion 唔怕整親背脊之餘，又揹得舒舒服服啦！

到呢度，精明嘅你可能會問？咦我好似見到個背囊有好多燈喎？係呀，呢個背囊有兩盞燈：第一盞晌個背囊入面，只要你打開個背囊就會著燈，方便用家晌夜晚伸手不見五指嗰陣，都可以搵到袋入面嘅嘢。第二盞就係 ｢龜殼｣ 上面，你只要利用背囊背帶上嘅控制器，就可以將盞燈變做指揮燈或者係單車後燈。呢個設計就可以幫到用家晌夜晚踩車嗰陣，不單止用單車尾燈，背囊上嘅燈亦都可以為後車做警示。

一打開個背囊，就會有盞燈著咗，方便你搵嘢。嘩！好好嘅設計！

用背帶就可以控制背囊 ｢尾燈｣ 打左右燈或者長著，鍾意踩夜車嘅朋友，呢個設計對你嚟講應該幾有用呢！

想買嗎？小編相信呢個 ｢龜殼｣ 暫時都係概念產品，未有量產嘅打算呢......

相關網站：

William Root - Backpack