一眾家長都會試過揀 BB 車俾自己的仔仔囡囡，今次小編介紹的 BB 車唔使推，靠自己踩之餘，仲多用途又超安全！

相信之前大家都睇過一段新聞：一部的士意外撞到推 BB 車過馬路的婆婆，幸好 BB 車有足夠保護，所以就算 BB 車被撞到倒下，車內 BB 都無危險。但 15km.hk 不是介紹 BB 車的網站，今次講的，是一部可以由爸爸 / 媽媽踩的三輪 BB 車，Taga 2.0。

其實小編之前都有介紹過一部叫 "Noomad" 的 ｢BB 單車｣，跑得之餘仲可以加喼或者坐一個小朋友；而 Taga 2.0 就比較樸實：驟眼睇，Taga 2.0 一足十一部 Dahon 摺車，只係車頭多了一個大箱及兩個轆......但其實唔係咁簡單！

Taga 2.0 可以說是一個超實用大箱！一看到Taga 2.0，一定會被單車車頭的大箱所吸引：採用金屬外框，加上強化塑膠及纖維製成的 ｢車箱｣，裝到單車車頭兩輪中間，內裡可變身成可一前一後坐的小朋友位、兩位小朋友對望坐 ｢火車｣ 位、單一個小朋友坐的豪華位、加汽車 BB 櫈坐 BB，以及所有東西摺起，變成一個超大單車行李箱！負重亦可以去到最高 70kg！去買餸最啱！｢車箱｣ 內亦可裝上不同配件，例如可以晌 ｢車箱｣ 中間加一條打橫的扶手，爸爸媽媽就可以晌這條扶手裝上不同玩具，例如水鎗 (?)，小朋友就坐得更開心喇！而坐位亦都設有安全帶，所以不用擔心發生小意外時，小朋友會被拋出車外......

外觀上 Taga 2.0 似足一部普通單車，但車頭的 ｢車箱｣ 一定吸引到不少爸爸媽媽注意！兩張 BB 櫈可以對坐，或者向前坐，亦可以摺低 BB 櫈，關埋車箱！

BB 櫈設有安全帶

兩位小朋友對坐

又或者向前坐

中間可以加扶手，之後裝上玩具例如水鎗！

｢去打仗呀！｣ 個細路心諗

唔坐小朋友又得喎！

邊個坐？當然係狗仔啦！貓奴們都可以考慮用佢嚟車大王出去玩 ( 如果大王肯的話......)

又或者踩出去買餸，唔使諗泊車嘢食又唔使自己攞！

而 Taga 2.0 亦可以加上一個 ｢車頂｣，就算遇著落雨，小朋友們都不會淋濕，但大人就會慘小小喇......

Taga 2.0 加上車頂，就唔怕日曨雨淋，睇落仲似火車車箱！但後面踩嗰個就慘了......

你睇！淋水落去都唔怕！

說回單車本身了，其實沒有甚麼特別，都是一般單車規格，例如 20 吋輪圈、Shimano 後輪 3 速內變花鼓......值得一提的是兩個前輪都用上碟剎，因為 Taga 2.0 比一般單車重 ( 車身 + 車箱 + 櫈約重 30kg )，要於緊急時候剎停 Taga 2.0 的話，碟剎絕對有能力勝任。而爸爸媽媽想踩得舒服一點，都可以加電池摩打作動力輔助，但不好意思，香港都係用不到......最後，Taga 2.0 看上去雖然似 Dahon 摺車，然而它真係算可以摺起，放入七人車的尾箱周圍去！爸爸媽媽要帶小朋友去遊單車河，從此變得簡單！

拆了 ｢車箱｣，就可以放入已收起第三排座椅的七人車內，其實都唔算難運輸吖~

有興趣？想知幾錢？上一代 Taga 1.0 售約 USD $1,500 ( ~HKD $11,700 )，今代新款之前於 Kickstarter 集資時只售 USD $650 ( ~HKD $5,070 )，因為超平關係，Taga 2.0 於首日推出就已經收集到超過 $100 萬美金資金，多出目標 10 倍！推出市場後亦只售 USD $1,000 ( ~HKD $7,800 )，如果要加動力輔助就要加多 USD $800 ( ~HKD $6,240 )。預計 2016 年 10 月 Taga 2.0 就會開始運送予買家！到時唔知香港會唔會見到呢？

相關網址：Tagabike