紐約一個插畫師，畫出於紐約踩單車的 12 種單車友，究竟呢 12 種車友可唔可以 Apply 落香港的車友度？你又屬於邊一類？

美國插畫師 Kurt McRobert 根據他於紐約嘅觀察，歸納出大約 12 種紐約單車友，並且圖文並茂咁形容佢哋的外型、踩車特色及來自邊度。小編就以 Kurt McRobert 所畫嘅呢 12 種單車友，大致分為三類，包括踩自己單車嘅，租單車嘅同埋開工要踩單車嘅，嚟睇下香港有無佢地呢啲單車友嘅蹤影，或者呢啲單車友晌邊度出現多啦！

( 睇完佢的插畫，驚見小編被完完整整咁畫咗出嚟！你哋都睇下 Kurt 有無畫到你出嚟，然之後 Share 晌你哋嘅 Facebook ，甚至 tag 埋你啲朋友都得！)

有自己車的單車友：

1. The Weekend Warriors - 週末戰士！
香港：各大單車徑、熱門郊遊地點

非常簡單，就係放假踩單車出去玩的車友！小編相信，大家都係呢類車友，所以先會上來睇我哋的文章，又或者路線介紹啦！

2. The Journeyman - ｢ Pro ｣ 友！
香港：好多地方都見到呀！青山公路、赤柱石澳、單車徑、西貢......

不用多說吧！紐約同香港的 ｢Pro｣ 友一樣，全副 ｢武裝｣，一 set 高級單車衫褲頭盔，一部價值起碼幾萬元的超靚 Road Bike，一個成功人仕，一到假日時分就會晌自己已經 set 好的路線，例如翔東路、青山公路等不斷練習，創造自己最佳時間、最高平均速度之餘，一有比賽就會毫不猶豫即刻參賽！對於推動單車運動，他們的投入程度一定攞滿分！

3. The Commuter - 以單車作代步的朋友
香港：其實唔多......不過踩摺車的通常會晌單車徑出沒！

Kurt 指，這類車友因為對紐約鐵路系統徹底失望 ( 喂！咁似我哋港鐵嘅？)，所以就索性辛苦少少，買架時下最靚的摺車，著住西裝成身汗咁踩返工。但香港可能真係太熱，要熱辣辣著住西裝踩車返工真係唔係個個人做到，加上我哋的港鐵綜合而言又真係比紐約的可靠，所以踩車去商業區返工的人，以小編所見，都仲係少之又少。所以佢哋放假先會 ｢蒲頭｣，晌各大單車徑出現！

4. The Manhattan Girl - 單車美女！
香港：我都想知邊度會見到！

據 Kurt 的觀察所得，紐約美女們都會於 Soho 區踩單車代步，講明美女，梗係吸引到眾人目光啦！但佢哋會去邊度，會踩單車去做乜呢，其實係一個謎......而在香港，究竟有沒有美女會在 Soho 區，甚至於市區以單車代步？小編都覺得都係一個謎......

5. The Hipster - 潮童？！
香港：單車徑總會搵到幾個......

紐約踩單車的 ｢潮童｣ 當然要 Keep 住瀟灑樣，所以一定唔會戴頭盔踩單車，而且一路講住電話，一路叼住支煙咁踩啦！( 15km.hk 絕不鼓勵大家吸煙！) 而香港的 ｢潮童｣，一早就去咗 Shopping，好少會踩單車啦！但係有時晌單車徑都會見到佢哋嘅踪影架！

6. The Fixie Kid - Fixed Gear 朋友
香港：單車徑！

據 Kurt 指，NYC Fixed Gear 朋友好易認：因為佢哋通常都會踩顏色鮮艷嘅 Fixie，單車無 Brake 同埋 ｢摩打腳｣ 咁踩單車！佢哋的簡約生活態度亦帶出另一種潮流。只係有啲朋友見到呢類單車，硬係覺得好危險.....而香港的 Fixed Gear 朋友其實都與紐約近似，佢哋亦都有復古 Feel 的 Fixie 同 Colourful 可愛系 Fixie，小編亦十分欣賞佢哋的愛車呢！先前我們 join 過台灣的 Fixed Style 夜行，大家有興趣都可以入去睇睇呢！

7. BMX-er，玩 BMX 的型男
香港出沒地點：各大屋邨、公園 ( 極少數會晌政府 BMX 場出現... )

玩得 BMX，當然鍾意玩花式啦！根據 Kurt 的講法，美國 BMX 朋友就鍾意晌各大廣場等練花式啦，一齊吹水啦，飲嘢啦，玩電話啦......等等。香港？都有，小編見到的多數會晌屋邨空地呀、公園呀，甚至有時會晌尖沙咀海旁出現添！BMX 場？葵涌呀，蒲崗村道公園都有呀！但聽講想入去玩就要考試攞牌，但係個考試又唔知點考，又唔知幾時有得考，加埋有些 BMX 場設計有問題，玩都玩得唔安全，所以佢哋邊會晌 BMX 場入面玩吖.....

租單車的：

1. The Tourist - 租車遊客
香港：梗係單車徑啦！

Kurt 對於紐約的單車遊客，即係我哋成日掛晌口邊的 ｢Jojo｣，都有一定見解：佢哋踩租車可能踩單車經驗唔多，加上體力有時未必足夠應付某啲路段，所以會突然停晌路中心影相、等人、抖......香港的情況其實好類似！証明 ｢Jojo｣ 其實好國際化！當然，小編都好想見到香港的 ｢Jojo｣ 比其他地區有突破，就係單車安全意識比其他人好啦！

2. The Park Slope Dad - 廿四孝老豆
香港：大尾篤 / 沙田單車徑

晌紐約的公園，好多時會見到充滿父愛的爸爸踩住單車，拖住後面坐晌拖架的小朋友兜圈，有陣時仲要辛苦上斜添！做爸爸真係唔易！而香港的 ｢廿四孝老豆｣ 就唔係踩拖車，而係踩四人大單車，晌大尾篤 / 水壩 / 沙田單車徑同媽媽同囝囝踩，自己出力三人享受！不過奉勸大家，踩呢類車要小心，唔好突然晌單車徑中心停低或者調頭，因為你咃太大部，後面單車好易會炒落你地度！同埋上斜最好落車推，因為你唔夠力踩上斜而溜後的話，後面跟你尾的單車就會即時變咗保齡球樽......

3. The Citibike - 使用 Bike Sharing 的朋友
香港出現地點：沒有！因為香港都無 Bike Sharing！

Kurt 形容，這類晌紐約踩 Citibank 的 Bike Sharing 單車 ( 即台灣的 YouBike！) 嘅人有很多種類，包括老人家、於曼哈頓返工的白領、遊客、情侶.....但亦有一個問題，就是佢哋多數 ｢踩得慢，無速度，唔夠快｣ 之外，亦因為踩路面經驗不多，所以成為馬路上的 ｢危險份子｣，而 Bike Sharing 首 30 分鐘免費呢點原來又會影響到當地的單車舖及租賃單車的生意。香港，要有 Bike Sharing 之餘，可能都要考慮一下會否影響到香港單車市場呢！

開工要踩單車的：

1. The Delivery Guy - 送外賣的
香港：市區的大街小巷

不難想像吧！紐約同香港都一樣，送外賣的人都會踩單車送外賣，而且紐約同香港的情況都好似：佢哋都係唔會理交通規則，逆線踩單車、上行人路啦 ( 小編覺得佢哋如果會禮讓行人的話，係無問題架！)，總之唔好阻到佢哋送外賣就得喇！

2. The Messenger - 踩單車速遞員
香港：送貨唔使用單車嘅，所以無！

Kurt 形容，速遞員們都勁趕時間，阻住佢哋一秒你都唔會好受，所以佢哋一定唔會理交通規則，而且晌繁忙的路段左穿右插，好似逆流而上的魚咁。香港的速遞員就比較 ｢幸福｣，因為佢哋會揸車或者坐地鐵，都唔會踩單車，所以唔會出現。其實之前有一套戲講呢類 "The Messenger"，戲名叫《Premium Rush》，中文名係《超急快遞》，我們之前都有介紹過架！

睇完咁多種 ｢紐約單車友｣，其實小編最後都係覺得，香港的車友同其他地方的車友，其實都幾似呢！大家又點睇？

資料來源：Kurt McRobert